E shtuna do të jetë një ditë për t’u mbajtur mend për padelin shqiptar. Në Sheshin Skënderbej do të luhen finalet e FIP Platinum Tirana, turneu që gjatë këtyre ditëve ka mbushur tribunat e fushës qendrore. Por të shtunën nuk do të ketë vetëm ndeshje vendimtare: pas finaleve do të zhvillohet edhe “Repeat the Energy”, eventi përmbyllës i turneut, që do të ndërthurë historinë e padelit me atë të Tiranës.
Sepse sporti nuk është vetëm garë: është gjuha më e vjetër që njerëzit ndajnë mes tyre. Nga notari që gjen qetësinë në ujë, te kërcimtarja që shprehet përmes lëvizjes, e deri te atleti që zbulon kufijtë e tij në fushë: sporti është mënyra se si njerëzit lidhen me veten dhe me të tjerët. Në Tiranë, ky realitet përjetohet për çdo ditë në rrugë, në sheshe dhe në trupat e njerëzve që refuzojnë të qëndrojnë në vend.
Falë punës së Repeat Fitness & Wellness Center, Sheshi Skënderbej do të bashkojë vallëzimin dhe padelin në një performancë plot drita dhe tinguj. Një grup valltarësh të veshur me kostume tradicionale shqiptare do të hyjnë në fushë pas finaleve, secili me një raketë padeli, elementi skenik që në koreografi përfaqëson simbolin e takimit mes traditës dhe sportit modern. Në sfond, një ndërthurje e muzikës folklorike shqiptare me një harmonizim bashkëkohor, do të shoqërojë spektaklin.
Një mbrëmje simbolike e kalimit nga përditshmëria drejt një bote plot lëvizje, mirëqenie dhe spektakli, me muzikën e DJ Aldo që do të ndezë natën. Do të jetë mënyra më emocionuese për t’i dhënë lamtumirën FIP Platinum Albania: padeli nuk do të largohet, padeli sapo ka mbërritur.