Përpara se të zbriste në fushë për gjysmëfinalen e FIP Platinum Albania, gjatë drekës në hotel, Ale Alonso-s iu soll një tortë e vogël. Megjithatë, dhuratën më të bukur Ale ia bëri vetes në fushën qendrore të Sheshit Skënderbej, duke siguruar së bashku me Ale Salazar finalen e dytë në po aq turne FIP Platinum në vitin 2026.
Ale dhe Ale e arritën këtë në mënyrën më të pabesueshme, me një përmbysje të jashtëzakonshme ndaj Aranzazu Osoro dhe Victoria Iglesias, të cilat kryesonin 6-1 5-3 30-30. Vetëm dy pikë larg fitores, kokat e serisë numër 4 u përballën me rikthimin spektakolar të Salazar dhe Alonso, që fituan setin e dytë dhe dominuan të tretin, duke triumfuar me rezultatin 1-6 7-6 6-2.
Mes Salazar/Alonso dhe titullit që në Marsejë iu shpëtoi për shkak të një dëmtimi në kaviljes së lojtares që pikërisht sot mbushi 20 vjeç, do të jenë Marina Guinart dhe Veronica Virseda, kokat e serisë numër 2, të cilat mposhtën Nuria Rodriguez dhe Giulia Dal Pozzo në tre sete (4-6 6-3 6-0).
MESHKUJT David Gala dhe Enzo Jensen, në turneun e tyre të parë si dyshe, konfirmohen si surpriza më e madhe e javës në Tiranë. Pas eliminimit të Coki Nieto dhe Jon Sanz, si edhe Alex Ruiz dhe Juanlu Esbri, dy lojtarët e lindur në vitin 2006 mposhtën edhe Martin Di Nenno (i cili nga java e ardhshme në BNL Italy Major Premier Padel në Romë do të rikthehet të luajë me Paquito Navarro) dhe Jairo Bautista, kokat e serisë numër 4, me rezultatin 6-2 6-4, duke siguruar finalen më të rëndësishme të karrierës së tyre të re.
Përballë tyre, megjithatë, do të jenë kokat e serisë numër 1, Franco Stupaczuk dhe Mike Yanguas, të cilët në gjysmëfinalen e dytë mposhtën në dy sete (6-4, 7-5) Maxi Arce dhe Alex Arroyo.
Nesër do të jetë një tjetër mbrëmje e paharrueshme për publikun e Sheshit Skënderbej: programi nis në orën 18:30 me finalen e femrave, ndërsa finalja e meshkujve do të zhvillohet jo më herët se ora 20:30.