Sheshi Skënderbej dhe Tirana janë gati të mirëpresin një kampione që ka shkruar historinë e Padelit. CV-ja e Alejandra Salazar, ose siç njihet nga të gjithë Ale, flet vetë: lojtarja spanjolle ka fituar 67 tituj, përfshirë një Kampionat Botëror në çift me Marta Marrero dhe shtatë Kampionate Botërore ekipore, gjashtë prej tyre radhazi. Ky rekord e bën atë sportisten (mes meshkujve dhe femrave) me më shumë tituj botërorë ekiporë në historinë e këtij sporti, një më shumë se një tjetër legjendë si Fernando Belasteguín.
Në moshën 40-vjeçare, Salazar do t’i japë fund karrierës së saj në Padel në fund të sezonit, por po e shijon “vallen e fundit” në stilin e saj. Në dy turnetë e fundit FIP Platinum, ato të Lionit (tetor 2025) dhe Marsejës (shkurt 2026), ajo arriti në dy finale, duke fituar atë të Lionit. Dhe javën e ardhshme do të kërkojë të fitojë një tjetër FIP Platinum në Shqipëri, në çift me një tjetër Ale, Alonso, një nga talentet më premtuese të NextGen të padelit botëror.
Ale Salazar dhe Ale Alonso, respektivisht numrat 13 dhe 14 të renditjes FIP, janë çifti favorit numër 1 i tabelës për femra të FIP Platinum Albania, të ndjekura nga numri 15 Marina Guinart dhe numri 16 Veronica Virseda. Guinart, një lojtare mëngjarashe shumë e fuqishme, fitoi CUPRA FIP Finals 2024 në Francë (turneu përmbyllës i CUPRA FIP Tour, pjesë e të cilit është edhe Platinum i Tiranës), arriti finalen e FIP Platinum në Lion dhe sidomos gjysmëfinalet në P2 të Cancun-it dhe në Italy Major Premier Padel të vitit të kaluar, turne që do të zhvillohet menjëherë pas atij në Sheshin Skënderbej.
CUPRA FIP Finals 2024 Guinart i fitoi së bashku me Victoria Iglesias, e cila do të vijë në Tiranë si favorite numër 4 në çift me argjentinasen Aranzazu Osoro; ndërsa favorite numër 3 do të jenë Bea Caldera dhe Carmen Goenaga, numri 17 i renditjes FIP, të cilat kanë arritur çerekfinalet në turnetë Premier Padel të Miami-t (P1) dhe NewGiza-s (P2). Martina Fassio (24) dhe talentja e re Raquel Eugenio (e lindur në 2008, numri 23 në botë) do të jenë favorite numër 5, të ndjekura në entry list nga italiania Carolina Orsi dhe një tjetër legjendë spanjolle, Patty Llaguno.
Në total, në Tiranë do të jenë 14 nga 30 lojtaret më të mira në botë: nga e marta 26 Maj, deri të shtunën 30 Maj, publiku shqiptar – që do të ketë hyrje falas në katër fushat e ngritura në sheshin më ikonik të kryeqytetit – do të shijojë spektaklin e madh të Padelit.