Shqipëria hyn në CUPRA FIP Tour dhe e bën këtë nga dera kryesore, me kategorinë më të lartë të turneut të organizuar nga Federata Ndërkombëtare e Padelit (FIP), Platinum. Janë katër nivelet e CUPRA FIP Tour, një turne I cili që nga krijimi i tij ka përjetuar një rritje mbresëlënëse: nga 6 ture në sezonin inaugurues (2019) është kaluar në 318 ture në vitin 2025 – sipas World Padel Report – të shpërndara në 166 evente, shumica e të cilave të organizuara në format “combined”, pra me praninë njëkohësisht të tabelës për meshkuj dhe asaj për femra. Janë të përfshirë mbi 5.000 atletë dhe në vitin 2026 CUPRA FIP Tour vazhdon të rritet, duke kaluar mbi 200 evente dhe 400 ture të shpërndara në pesë kontinente: shifra që konfirmojnë zgjerimin e madh të Padelit në botë, ku Shqipëria rikthehet protagoniste pas FIP Promotion Albania Open 2023.
Në sheshin ikonik Skënderbej në Tiranë, nga 26 deri më 30 maj, do të jetë më e mira e CUPRA FIP Tour, me 300 pikë në lojë për renditjen FIP për çiftet fituese dhe me një tabelë të përbërë nga disa prej lojtarëve dhe lojtareve më të mira në botë, si dhe talente të rinj të NextGen në ngjitje në skenën ndërkombëtare. Në piramidën e turneut të Cirkuitit Ndërkombëtar të Padelit, pas riorganizimit të kategorive në vitin 2025, renditen gjithashtu FIP Gold (150 pikë për çiftet fituese), FIP Silver (80) dhe FIP Bronze (40). Ai i Tiranës do të jetë FIP Platinum i dytë i sezonit pas atij të zhvilluar në shkurt në Marsejë, i fituar nga spanjollët Javi Leal dhe Fran Guerrero për meshkuj dhe nga bashkëkombëset Lucia Sainz dhe Raquel Eugenio për femra. Të tjerët tashmë në kalendar janë ato të Paredes (Portugali, qershor), Lion (Francë, shtator) dhe Meksikë (nëntor).